Arddangosfa Thomas Phillips
17eg Ganrif
Alexander Oliver Exquemelin. Bucaniers of America. London, 1684.
Dyma’r argraffiad Saesneg cyntaf o’r clasur am forladron gan Alexandre Olivier Exquemelin (c. 1645-1707), a fu yntau yn fycanîr. Ym 1666 cyflogwyd Exquemelin gan Gwmni India’r Gorllewin Ffrengig ac aeth i Tortuga lle'r arhosodd am dair blynedd. Yno yr ymunodd â'r bycanîrs, yn enwedig â chriw'r Llyngesydd a’r preifatîr o Gymro Harri Morgan (1635-1688) a hynny fel barbwr-llawfeddyg fwy na thebyg, gan barhau yn eu cwmni tan 1674. Cyhoeddwyd y gwaith hwn yn gyntaf yn yr Isalmaenig ym 1678, ac mae’r cyfieithiad hwn yn seiliedig ar fersiwn Sbaenaidd a gyhoeddwyd ym 1681. Anrhydeddodd Exquemelin Morgan â phortread a golygfa ohono’n difetha llynges Sbaen. Eto i gyd, cyflwynodd Morgan achos o enllib yn ei erbyn a bu’n llwyddiannus. Dyfarnwyd £200 iddo.
