Arddangosfa Thomas Phillips
17eg Ganrif
Isaac Pontanus. Rerum et urbis Amstelodamensium historia. Amsterdam, 1611.
Dyma’r hanes manwl cyntaf i’w gyhoeddi am Amsterdam. Enillodd yr awdur, Isaac Pontanus(1571-1639), ddoethuriaeth yn Leiden a bu’n astudio gyda’r seryddwr Danaidd Tycho Brahe(1546-1601). Mae’r gwaith yn rhagori’n fawr ar y disgrifiadau o drefi a oedd yn arferol yn ystod y cyfnod hwn, gan gynnwys adroddiadau manwl am deithiau darganfod a theithiau masnachol dinasyddion mentrus Amsterdam. Mae Pontanus hefyd yn rhoi disgrifiad manwl o farchnadoedd stoc a nwyddau Amsterdam a oedd ymhlith y marchnadoedd cyntaf o’u bath yn y byd a’r pwysicaf ar yr adeg honno. Ymhlith yr adrannau o'r gwaith sy’n arbennig o bwysig mae’r adroddiadau lle mae Pontanus yn cynnwys adroddiadau am ymdrechion yr Iseldiroedd i ddod o hyd i Lwybr o’r Gogledd i’r Dwyrain a dwy daith gyntaf yr Iseldiroedd i India’r Dwyrain. Enynnodd y llyfr wrthwynebiad ffyrnig o wahanol garfannau ac roedd ar Fynegair y llyfrau gwaharddedig am nifer o flynyddoedd.
